BUTUAN CITY – Kontrolado sa kagamhanan sa Ukraine ang sitwasyon sa ilang nasud, bisan pa man sa tensyon nga mugna sa Russia tungod sa pagpadala nila og tropa sa ilang utlanan.
Sa eksklusibong pakighinabi sa Bombo Radyo Butuan, gipadayag ni Bombo international correspondent Marcel Aquino nga nagsugod ang tensyon sa Ukraine ug Russia niadtong 1990s dihang nabungkag na ang German wall nga maoy nagtunga sa East ug sa West kansa mao na ang pagkabungkag usab sa Union Soviet Socialist Republic kon USSR niadtong 1992.
Dinhi na matud pa nagsugod paglipang ang North Atlantic Treaty Organization kon NATO block sa esteng bahin sa Urupa.
Misamot ang kalagot sa Russia dihang mi-apil na usab sa NATO block ang Poland, Romania, Croatia, Yugoslavia ug ang katapusan mao na ang Ukraine.
Dinhi na usab mihatag og ultimatum ang kagamhanan sa Russia ngadto sa Ukraine nga dili magpasakop sa NATO hinungdan nga nagpakatag ang Russia og 120-mil ka mga sundalo sa utlanan.
Kagabii, nanawagan matud pa ang presidente sa Ukraine ngadto sa katawhan nga magmakalmahon lang tungod kay kontrolado nila ang sitwasyon ilabina nga nagpadala na og ammunition aid ang Estados Unidos ug ang United Kingdom nagpadala na usab og scud missiles ug stinger missiles usab sa ubang mga NATO member states kansa preparasyon na higayong mu-ulbo ang giyera.
Giklaro pa ni Aquino nga wala magpadala og mga sundalo ang US ug ang NATO kondili mga kagaMitan lang sa panggiyera nga maoy gamiton sa mga sundalong Ukrainians.
