BUTUAN CITY – Wala na makurat pa si kanhi Sangguniang Kabataan kon SK chairman Webster Montero sa Brgy Ong Yiu ning siyudad sa Butuan sa mga nag-file karon og petisyon sa Korte Suprema nga nagkwestyon sa constitutionality sa pagsibog sa Barangay ug SK elections ingon man paglugway sa ilang mga termino.
Sa eksklusibong pakighinabi sa Bombo Radyo Butuan, gipadayag niining nadismaya siyang nalugwayan ang termino sa mga incumbent officials tungod kay nahikawan man sa katungod ang matag-Filipino pagpili sa gusto na unta nilang mangatungdanan diha sa ilang tagsa-tagsa ka barangay.
Ang pagpirma matud pa ni Pangulong Ferdinand Marcos Jr sa Republic Act 12326 naglapas sa katungod sa matag-Filipino nga makabotar na unta karong Nobyembre 2 ning tuiga.
Gawas pa, makadismaya usab kini sa panig sa kabatan-unang gustong mahimong opisyal sa barangay tungod kay nahikawan man sila sa ilang katungod nga makaserbisyo sa ilang hingtungdang barangay ilabina kadtong dili na makadagan pag-abot sa tuig 2028.
Dugang pa ni Montero, wala matud pa’y problema kung ang mga opisyales sa usa ka barangay sama sa Brgy Ong Yiu, maayo ang pagdumala sama sa incumbent SK chairman nila.
Apan dakong problema kini sa mga constituents sa mga barangay nga gusto nang mag-ilis og mga opisyal tungod sa kawala nila’y nahimong kaayuhan.
