BUTUAN CITY – Gi-asdang sa House Committee on Agriculture and Food ang pagdugang sa pondo sa Department of Agriculture o DA tungod sa hulga sa nagpadayong El Niño ug uban pang problema sa sektor sa agrikultura.
Nahisgutan sa Budget and Review Subcommittee sa House of Representatives ang epekto sa padayong pagsaka sa presyo sa mga produktong petrolyo, nga usa sa dagkong gasto sa inadlaw-adlaw nga operasyon sa mga mag-uuma ug mangingisda.
Sa food security, gibutyag ni Committee Chairperson Rep. Mark Enverga, nga andam ang National Rice Program sa gobyerno aron matabangan ang mga apektadong sektor ug masiguro ang igo nga suplay sa pagkaon sa nasud.
Lakip usab sa mga lakang ang pagpadayon sa fertilizer assistance alang sa mga mag-uuma aron makatabang sa ilang pagbawi gikan sa mga nawad-an o nadaot nga pananom ug mapataas pag-usab ang ilang produksiyon.
Naggahin usab og pondo alang sa pagtukod og mga cold storage facility aron mapreserbar ang mga ani panahon sa ting-init, ilabina ang mga high-value crops nga dali madaot tungod sa taas nga temperatura. Samtang, tungod sa hulga sa kakulang sa tubig nga dala sa grabeng hulaw, gi-asdang usab sa komite ang mas lapad nga pag-instalar sa solar pump irrigation systems sa mga umahan.
