BUTUAN CITY- Gibasura sa Commission on Audit kon COA ang motion for reconsideration ni Vice President Sara Duterte batok sa pag-disallow sa P73 milyon nga confidential expenses sa Office of the Vice President kon OVP nga gigasto niadtong 2022.
Sa resolusyon nga gipetsahan og Oktubre 5, gipabilin sa COA ang una niining desisyon tungod wala makapakita ang OVP og igo nga mga dokumento nga nagpamatuod sa paggamit sa maong pondo, lakip ang P69.787 milyon nga gigasto isip reward sa mga informant ug P3.5 milyon alang sa mga lamesa, lingkuranan, computer ug printer.
Sumala sa COA, wala makapakita ang mga dokumentong gisumite sa OVP sa konkretong resulta sa mga information-gathering ug surveillance activities nga giingong basehan sa paghatag sa mga reward, samtang kulang usab ang dokumentasyon sa pagpalit sa mga kagamitan.
Sigon sa audit body nga ang maong mga paggasto wala makasunod sa mga lagda sa paggamit sa confidential funds ug tungod niini, gipaninglan og personal nga liability si Duterte ug ang ubang opisyal nga nalambigit sa pag-apruba ug pagpagawas sa pondo.
Sa laing bahin, gibutyag sa OVP nga wala pa niini madawat ang kopya sa resolusyon, apan andam kini nga motubag pinaagi sa tukmang legal ug institusyonal nga mga pamaagi.
