BUTUAN CITY- Dili na i-presentar sa House prosecution panel si kanhi senador Antonio “Sonny” Trillanes IV isip saksi sa impeachment trial ni Vice President Sara Duterte. Gipahibalo ni House lead prosecutor Gerville Luistro, atol sa ika-32 nga adlaw sa impeachment trial nga pinal na ang desisyon sa prosecution, bisan wala niini dayon gipadayag ang espesipikong rason niini.
Una nang gibutyag ni Senator-judge Raffy Tulfo nga kinahanglan una mahatag ang testimonya ni Trillanes sa dili pa si Anti-Money Laundering Council Executive Director Ronel Buenaventura, tungod sa mga alegasyon kaniadto ni Trillanes bahin sa mga bank account sa pamilya Duterte.
Samtang, gi-reject ni Senate impeachment court presiding officer Francis “Chiz” Escudero ang hangyo alang sa subpoena batok kang Trillanes. Gilauman usab nga motestigo si Buenaventura niining semanaha, diin sumala ni Luistro mahimong molawig ang diskusyon sa mga rekord sa AMLC tungod sa posibleng mga pangutana gikan sa mga senator-judge ug cross-examination sa depensa..
