BUTUAN CITY- Gi-awhag sa Department of Health kom DOH ang publiko nga gamiton ang National Emergency Hotline 911 kung gikinahanglan ang emergency care tungod sa grabeng epekto sa El Niño sa kahimsog.
Kalabot kini sa gipaabot nga grabeng El Niño sa nasud hangtod sa unang quarter sa sunod tuig, nga maoy hinungdan sa kabalaka sa daghang Pilipino tungod sa posibleng epekto niini.
Usa sa mga nag-unang gikabalak-an mao ang heat exhaustion nga mahimong mosangpot sa heat stroke, usa ka makamatay nga medical emergency.
Mahimo kini nga hinungdan sa pagkawala sa panimuot, peligroso nga pagsaka sa temperatura sa lawas, kalisod sa pagginhawa, kalibog, pag-ungot o kalisod sa pagsulti, ug kombulsyon.
Tungod niini, gipahinumdoman sa ahensya ang publiko nga kung makamatikod og bisan unsang timailhan sa heat stroke, kinahanglan dayong motawag sa 911 o dad-on ang pasyente sa labing duol nga ospital o health facility.
Girekomenda usab sa DOH ang pagsul-ob og gaan, luag ug hayag nga kolor nga sinina, ingon man ang kanunay nga pag-inom og walo hangtod napulo ka baso nga tubig matag adlaw.
