BUTUAN CITY – Tulo ang patay samtang 36 ang angol human gi-atake ang duha ka tugpahanan sa Saudi Arabia, taliwala sa nagkagrabeng panagbangi sa Yemen.
Sigon sa Saudi civil aviation authorities, usa ang namatay ug walo ang angol sa pag-atake sa King Khalid International Airport sa Riyadh, samtang duha ang namatay ug 28 ang angol sa pag-atake sa mga pasilidad sa Abha Airport.
Gi-angkon sa grupong Houthi nga sila ang responsable sa pipila ka pag-atake, lakip na ang paggamit og mga drones batok sa tugpahanan sa Riyadh.
Isip tubag, naglunsad usab og mga pag-atake ang Saudi-led coalition batok sa mga target sa Houthis sa Yemen, diin kapin 80 ka Houthi military sites sa mga probinsya sa Saada, Hodeidah, Jawf ug Marib ang ilang gi-atake.
Gi-atake usab sa Houthis ang Aden International Airport sa Yemen gamit ang mga missiles ug drones. Matud sa Yemeni Transport Ministry, mitugpa ang usa ka missile duol sa runway, pipila lang ka minuto sa wala pa ang pagtugpa sa usa ka flight gikan sa Cairo. Tungod niini, wala gipadayon sa eroplano ang pagtugpa ug sa gi-divert ang flight ngadto sa Jeddah, Saudi Arabia.
Samtang gibutyag sa sa International Organization for Migration o IOM nga nagpadayon ang bangi tali sa Yemen, nga miresulta sa paghikling sa kapin 200,000 ka mga tawo.
