BUTUAN CITY – Temporaryong giputol sa Senate Impeachment Court ang opisyal nga livestreaming sa impeachment trial ni Vice President Sara Duterte kaganina human nagpadayag og kabalaka ang testigo nga si Bureau of Internal Revenue o BIR Chief of Staff Atty. Anne Loraine Garcia-Marquez bahin sa privacy sa pipila ka opisyal sa ahensya.
Kini human gipakita ug gi-flash sa mga monitor ug screen sulod sa impeachment court ang sensitibong personal nga impormasyon sa mga revenue officer ug examiner sa BIR nga nagdumala sa mga dokumento kalabot sa tax examination.
Tungod niini, gimando dayon sa impeachment court ang temporaryong pagputol sa broadcast aron masusi ug ma-redact o matabonan ang pribadong impormasyon, subay sa Data Privacy Act ug sa mga probisyon sa Tax Code bahin sa confidentiality sa impormasyon sa mga taxpayer ug tax investigation.
Nagpadayon ang pagtestigo ni Garcia-Marquez sa iyang ikaduhang adlaw sa pag-atubang sa impeachment court, kalabot sa Article 2 sa impeachment complaint nga nagtumong sa alegasyon sa unexplained wealth ug income tax returns o ITR ni Vice President Sara Duterte ug sa iyang bana nga si Atty. Manases “Mans” Carpio.
Gipadayon usab sa Senado ang hearing samtang giatiman ang seguridad ug pagpresentar sa mga electronic exhibit aron masiguro nga dili malapas ang data privacy rights sa mga public officials ug kawani sa gobyerno samtang nagpadayon ang public trial.
