BUTUAN CITY – Gipasalig ni defense spokesperson Atty. Michael Poa nga ipadayag sa kampo ni Vice President Sara Duterte ang ilang kaugalingong depensa batok sa mga alegasyon sa unexplained wealth higayong ipresentar na nila ang ilang mga ebidensya sa impeachment trial.
Gi-awhag ni Poa ang publiko nga tagdon ang mga nadungog ug nahisgotan sa mga pagdungog kansa hangtod karon gibase pa lamang sa panig sa prosekusyon, busa kinahanglan pa nga madungog ang tubag sa depensa sa dili pa mohimo og konklusyon.
Gilikayan usab ni Poa ang paghisgot sa mga kantidad sa credit card transactions ug sa gika-ingong mga transaksiyon sa gawas sa nasud, lakip ang mga nalambigit sa usa ka kumpanyang gihisgotan sa pagdungog, tungod sa sub judice rule nga naglimita sa paghisgot sa pipila ka detalye sa mga kaso samtang anaa pa kini sa proseso sa paghusay.
Dugang ni Poa, dili maka-angayon alang sa kampo sa depensa nga ipagawas daan ang mga detalye sa ilang mga argumento samtang wala pa nila mapresentar ang ilang mga ebidensya.
Gi-angkon usab niya nga anaa sa dehadong kahimtang ang depensa tungod kay kinahanglan pa silang maghulat sa ilang turno sa pagtubag, ilabina kay ang kaso adunay dakong bahid sa pulitika.
Bisan pa man niini, giklaro niya nga adunay kaugalingong bersiyon sa mga panghitabo ang kampo ni Duterte nga ilang ipresentar sa hustong panahon.
