BUTUAN CITY – Gipadayag ni Department of the Interior and Local Government kon DILG Secretary Jonvic Remulla nga ania sa Mindanao si Senador Ronald “Bato” dela Rosa ug gika-ingong gipanalipdan matud pa sa usa ka gamhanan nga armadong grupo.
Sigon ni Remulla, nahibalo na ang gobyerno sa kinatibuk-ang lugar nga nahimutangan sa senador, apan wala niya ibutyag ang eksaktong lokasyon tungod sa nagpadayon nga negosasyon alang sa iyang boluntaryong pagsurender o pag-turn over ngadto sa mga otoridad.
Sumala sa kalihim, karon lang niya natimbang-timbang nga mas maayo unta kung iya na kining gipadakop dihang nagpakita kini sa Senado ug wala na lang gitamod ang gibutyag niyang gentleman’s agreement.’
mas gipili sa gobyerno ang pakigsabot sa maong grupo aron malikayan ang posibleng duguong komprontasyon kung pugson sa mga otoridad ang pagdakop sa senador.
Gibutyag niini nga ang grupo nga gika-ingong nanalipod sa senador adunay daghang armado nga mga tawo ug dako usab og kapasidad, hinungdan nga gikonsidera sa gobyerno ang mas malinawon nga pamaagi alang sa turnover.
Gipasidan-an ni Remulla nga kung pugson ang pagdakop kang Dela Rosa ug mosukol ang grupo nga nagpanalipod kaniya ug posibleng mu-abot sa 10,000 ang mamatay tungod kay mahimong musukol sila sa himuong komprontasyon.
Matud pa sa kalihim, gusto nilang malikayan nga ang sitwasyon mahimong sama sa usa ka mas dakong kagubot diin mahimong mosulod o mopahimulos ang ubang armadong grupo.
Busa mas gipili niya ang negosasyon kaysa paggamit dayon og pwersa, aron mapanalipdan ang kinabuhi sa mga Pilipino ug malikayan ang paggrabe sa sitwasyon.
