BUTUAN CITY – Gikumpirma ni Atty Sonny Matula, presidente sa Federation of Free Workers nga sama sa mga prosecutors sa criminal proceedings sa regular nga korte, aduna’y diskresyon ang House prosecutors sa impeachment trial nga tangtangon ang mga akusasyon batuk sa akusado kansa duna’y pagtugot sa korte.
Sa eksklusibong pakighinabi sa Bombo Radyo Butuan, gipadayag ni Matula nga ang pag-drop sa House Prosecution panel sa tulo ka artikulo sa Articles of Impeachment batuk kang Vice President Sara Duterte, posibleng tungod sa ilang pagtuo nga igo na ang Article II kon unexplained wealth aron iduot ang besi presidente nga posibleng magpa-impeach kaniya.
Gipasabot ni Matula nga sa tulo ka mga artikulong gitangtang sa prosekusyon, mahimo pa nilang ibalik ang kasong confidential funds ingon man ang grave threats tungod kay makonsidera man kining with prejudice kon dili na mahimong buhion samtang ang kasong bribery kon pagpanuhol, gikonsidera man usab nga without prejudice kon mahimo pang ibalik o buhion.
Tungod sa gihimo sa prosekusyon kondiin wala na sila’y ipresentang ebidensya ug testigo, gihatagan na matud pa og panahon ang prosekusyon alang sa ilang himuong formal offer of evidence sa kasong unexplained wealth aron komentuhan o kaha supakon sa defense team pinaagi sa ilang idusong demurrer to evidence.
Kini kung makita sa depensa nga wala’y igong ebidensya ang prosekusyon sa nahabiling artikulo batuk sa besi presidente.
