BUTUAN CITY – Angayan unang susihon sa tanan ilabina sa mga senator-judges kung ang ilang mga gi-imbitar nga amici curiae, wala ba’y political biases tungod kay kung duna sila’y gidapigang mga pulitiko, sigurado matud pa nga ang ila unyang mga giluwatang pamahayag, adto mudapig sa mga pulitikong ilang gidapigan.
Kini ang reaksyon ni Professor Gerry Caño, ang presidente sa Professional Criminology Association of the Philippines kon PCAP. Sa eksklusibong pakighinabi ning sibyahan, gipadayag niining nga si kanhi Chief Justice Hilario Davide Jr, nag-endorso niadtong 2016 national elections kang kanhi vice presidential candidate ug karon Senador Kiko Pangilinan.
Samtang si kanhi Chief Justice Artemio Panganinban, nagpagawas og artikulong duna’y titulong ‘How Will You Solve A Sara Problem.’ Tungod niini, sa iyang lantaw, duna na’y political biases ang nasangpit nga mga kanhi huwis sa pagpadayag sa ilang mga opinyon kagahapon.
Dugang pa nga obserbasyon ni Professor Caño, aminado ang upat ka mga amicus curiae nga 24 gayod ang mga senador ug ang ¾ niini, mao ang 16 k mga senador base sa Konstitusyon.
Mitumaw lang ang isyu sa voting threshold dihang pipila sa mga senador ang wala makasalmot sa impeachment trial tungod sa managlahing rason.
Ang dili matud pa angayang kalimtan sa tanan nga sa pag-transmit sa House Prosecution sa impeachment case batuk kang Vice President Sara Duterte, ang tanang 24 ka mga senador, ilang gihatagan og baga kaayong mga dokumento aron ilang matun-an.
