BUTUAN CITY – Hangyuon sa sa House prosecution ang Senate impeachment court nga tugutan silang ideklarang hostile witness si Davao City Mayor Sebastian “Baste” Duterte kung motestigo siya sa impeachment trial sa iyang igsoon nga si Vice President Sara Duterte.
Sumala ni House prosecution legal spokesperson ug counsel Benjamin Tolosa Jr., kinahanglan una nilang mapamatud-an nga ang interest ni Baste dili uyon sa interes sa prosekusyon aron matawag siyang hostile witness.
Kung aprobahan kini sa Impeachment Court, mas lu-ag ang pamaagi sa pagpangutana sa mga prosecutors kang Baste tungod kay mahimo silang mogamit og mga leading questions, o mga pangutana nga adunay klarong direksyon sa tubag.
Kabahin sa gustong ipangutana sa prosekusyon kang Baste ang mga business interests ni Vice President Sara Duterte ug ang posibleng koneksyon niini sa mga transaksyon sa Davao City government.
Kabahin kini sa Article II sa impeachment case diin gi-akusahan ang iyang igsoon nga wala niya hingpit nga gisurender ang iyang mga interes sa negosyo ug padayon gihapon siyang nalambigit niini samtang bise presidente.
Gilauman nga una nga ipresentar sa prosekusyon ang mga opisyal ug rekord gikan sa Civil Service Commission, Securities and Exchange Commission ug Philippine Government Electronic Procurement System.
Gamiton sa prosekusyon ang mga dokumento aron ikumpara ang mga business interests nga na-declare ni VP Sara sa iyang Statement of Liabilities and Networth kon SALN ug ang mga rekord gikan sa mga kompanya ug ahensya sa gobyerno.
Orihinal nga gikatakda si Baste nga motestigo sa Setyembre 23, kauban sila Atty Gary Samonte ug Police Major Jerrickson Sangalang apan mahimo pa kining mausab tungod kay hisgutan usab sa agenda sa maong adlaw ang paghisgot sa gidaghanon sa mga boto nga gikinahanglan aron ma-convict ang besi presidente.
Si Samonte gilauman nga magdala og mga rekord gikan sa PhilHealth Regional Office XI, samtang si Sangalang maghatag og impormasyon bahin sa mga armas nga narehistro sa pangalan ni VP Sara ug sa iyang bana nga si lawyer Manases Carpio.
Ang kataposang desisyon kung ideklarang hostile witness si Baste anaa gihapon sa Impeachment Court.
