BUTUAN CITY – Gihangyo ni Davao City Representative Paolo “Pulong” Duterte ang National Bureau of Investigation kon NBI nga i-apil usab sa ilang imbestigasyon ang mga flood control projects sa distrito ni Laguna Representative Ann Matibag, asawa ni NBI Director Melvin Matibag.
Kini human gipadayag sa NBI nga ipatawag niini ang mga contractors nga nalambigit sa mga flood control projects nga nakita-an og mga red flags sa unang distrito sa Davao City.
Nasayrang base sa pagsusi sa NBI sa maong distrito, 47 sa 100 ka proyekto ang duna matud pa’y red flags ug sigon ni Duterte, gusto niyang makita ang mga dokumento, bidyo ug ang aktuwal nga mga proyekto nga gi-ingong adunay problema o gipasanginlang substandard ug ghost projects.
Gipunto usab sa kongresista nga kung seryoso ang imbestigasyon, kinahanglan parehas ang sukdanan sa pagsusi sa tanang lugar ug dili lamang mupili og pipila ka proyekto o distrito nga imbestigahan.
Gikwestiyon usab ni Duterte kung ipatawag ba sa NBI ang mga contractors nga Discaya, nga iyang gika-ingong nalambigit usab sa duha ka proyekto sa distrito ni Representative Matibag tungod kay aduna sila’y mga bidyo ug dokumento nga may kalabutan sa maong mga proyekto.
Nanawagan usab si Duterte nga ipakita sa publiko ang imbestigasyon sa NBI, lakip ang mga ebidensya ug resulta sa mga pagdungog, aron makita ang aktuwal nga mga proyekto ug ang proseso sa pag-imbestiga.
Sa pagkakaron, padayon pa ang imbestigasyon sa NBI ug wala pa kini nag-ingon nga adunay iregularidad sa tanang proyekto nga ilang gisusi.
