BUTUAN CITY – Hugot nga gibarugan ni retired Supreme Court Associate Justice Adolfo Azcuna nga kabahin sa constitutional design ang taas nga requirement nga two-thirds sa tanang miyembro sa Senado aron ma-convict ang usa ka impeachable officer. Matud ni Azcuna, gituyo ang maong probisyon aron mahimong estrikto ang impeachment process ug dili basta-basta maabot ang conviction batok sa usa ka opisyal nga gi-impeach.
Gipasabot ni Azcuna nga ang pulong nga “two-thirds of all the Members of the Senate” lahi sa usa ka requirement nga ibase lamang sa mga senador nga present ug aktibong nakigbahin sa proceedings. Tungod niini, iyang baruganan nga ang tanang incumbent nga miyembro sa Senado kinahanglan iapil sa pagkwenta sa two-thirds requirement, bisan pa man kon adunay mga miyembro nga dili makatambong o dili maka-apil sa hearing.
Sa iyang paghisgot sa ubang mga nasud, gibutyag usab ni Azcuna nga lahi ang pamaagi sa impeachment sa Indonesia ug South Korea.
Sa Indonesia, ang requirement alang sa conviction gibase sa two-thirds sa mga miyembrong present, samtang sa South Korea, sama sa Pilipinas, two-thirds sa tanang miyembro sa parliament ang gikinahanglan alang sa conviction.
Ang maong panglantaw ni Azcuna kabahin sa diskusyon sa Senate impeachment court kon magpabilin ba nga 16 ka boto ang gikinahanglan aron ma-convict si Vice President Sara Duterte.
Sa 24 ka miyembro sa Senado, ang two-thirds bugti sa 16 ka boto. Ang isyu nga gikonsiderar sa impeachment court mao kung ang voting base kinahanglan magpabilin sa kompletong 24 ka miyembro o mausab tungod sa pipila ka senator-judge nga dili aktibong makaapil sa proceedings.
