BUTUAN CITY – Gipadayag ni Senator-judge Raffy Tulfo ang klarong susamang mga pirma sa mga resibo sa confidential funds sa Office of the Vice President o OVP ug sa Department of Education o DepEd, ug nagduda siya nga posibleng usa ra ka tawo ang mipirma niini.
Gikwestiyon usab ni Tulfo kung nasubay ba sa prosecution ang mga batang masuso ug mga menor de edad nga gilista isip mga payees sa maong mga dokumento.
Posible usab, matud pa nga ang ilang mga ginikanan maoy mipirma sa mga dokumento alang sa ilang mga anak.
Gi-angkon usab ni prosecution lawyer Atty. Mae Divinagracia nga wala nila mahimo ang pagsubay sa maong mga pangalan tungod sa kakulang sa panahon.
Tungod niini, gisugyot ni Tulfo nga ipatawag si kanhi DepEd Schools Division Office o SDO official Edward Fajarda, nga matud pa niya, mao ang usa sa makahatag og klarong tubag ug kamatuoran bahin sa mga pangalan nga nalista sa maong mga dokumento.
