BUTUAN CITY – Gideklara ni Pangulong Ferdinand Marcos Jr. nga special non-working days sa National Capital Region o NCR ang Nobyembre 16 hangtod 18 aron mahatagan og dalan ang pagpahigayon sa 49th Association of Southeast Asian Nations o ASEAN Summit ug mga related summits.
Ang maong kalihokan magtigom sa mga lider gikan sa Southeast Asia ug ubang mga nasod ug tumong niini nga maminusan ang kahuot sa dagan sa trapiko ug masiguro ang kaluwasan ug kahapsay sa paglihok sa mga delegado ug mga partisipante sa maong kalihokan.
Ang maong deklarasyon nakalatid sa Proclamation 1447 nga gipirmahan ni Executive Secretary Ralph Recto niadtong Septiyembre 17 ubos sa pagtugot ni Pangulong Marcos.
Nasayran nga ang Pilipinas maoy napiling host country sa 49th ASEAN Summit, diin si Pangulong Marcos ang magsilbing chairman.
Gikatakdang ipahigayon ang summit sa Philippine International Convention Center sa Pasay City, samtang ang ubang kalihokan himoon sa Coconut Palace.
