BUTUAN CITY – Gihagit ni United States President Donald Trump ang mga lider sa kalibutan sa dinalian ug pormal nga pagbiya na sa International Criminal Court (ICC), samtang iyang gitawag ang maong korte nga usa ka badlongon nga institusyon.
Sa iyang diskurso sa tinuig nga United Nations General Assembly (UNGA), gisaway pag-ayu ni Trump ang ICC ug gihulagway kini nga usa ka “out of control institution” ug “evil group of people.”
Sumala pa niini nga walay kredibilidad ang maong korte ug gilapas niini ang mga prinsipyo sa hustisya ug nasudnong soberanya.
Giklaro usab sa presidente sa Amerika nga dili gyud tugotan sa Estados Unidos nga ipailalom ang ilang mga sundalo o lungsoranon sa gitawag niyang “show trials” sa usa ka tribunal nga kontra-Amerikano.
Ang maong hait nga pamahayag sa administrasyong Trump naggikan sa grabeng tensyon human nagpagawas ang ICC og arrest warrant batok sa primer ministro sa Israel nga si Benjamin Netanyahu—nga usa ka suod ug nag-unang alyado sa Estados Unidos.
Tungod niini, ang gobyerno sa US nagbahad na usab og mga lakang ug posibleng mga sanction batok sa mga opisyal sa maong korte aron panalipdan ang ilang mga ka-alyado ug interes sa tibuok kalibutan.
