BUTUAN CITY- Gipakita sa mag-igsuon nga Yulo ang kusog nga pagsugod sa men’s floor exercise sa 20th Asian Games, diin nanguna si Carlos Edriel Yulo human sa Subdivision 1 nga nakakuha og 14.600 puntos, samtang ikaduha ang iyang manghod nga si Karl Eldrew Yulo nga adunay 13.966 puntos.
Ikaupat sa provisional standings si Juancho Miguel Besana ug ikalima si Justin Ace De Leon, diin upat ka Pilipinong gymnast ang kasamtangang naa sa Top 5.
Apan temporaryo pa kini nga standing tungod kay moapil pa sa Subdivision 2 ang mga gymnast gikan sa Japan, China ug South Korea, diin human niini mapili ang Top 8 nga mokuwalipikar sa men’s floor exercise final.
Bisan pa sa sayop nga nahitabo sa vault routine ni Carlos, nagpabilin gihapon siya nga adunay kahigayunan sa ubang apparatus.
