BUTUAN CITY – Tulo ang gikatahong namatay sa pagpamusil nga nahitabo sa Banga National High School sa Banga, South Cotabato, kaganina, adlaw’ng Biernes, Septembre 18.
Sumala sa pasi-unang impormasyon gikan sa mga otoridad, nahitabo ang insidente pasado ala-1:30 kaganinang hapon, partikular sa Grade 9 area sa eskwelahan kondiin lakip sa mga gikatahong namatay ang usa ka magtutudlo, samtang adunay mga estudyante nga nasamdan ug gidala sa mga ospital alang sa pagpatambal.
Padayon pang gisuta ang insaktong gidaghanon sa mga namatay ug nasamdan, busa padayon pa ang validation sa mga otoridad.
Gihangyo usab sa Department of Education ang publiko nga dili magpakaylap og wala pa mapamatud-ang impormasyon o mga bidyo sa insidente aron mapanalipdan ang pribasiya sa mga biktima ug ilang pamilya.
Gisuspenso usab ang klase sa tanang lebel sa tibuok munisipyo sa Banga isip lakang sa pagseguro sa kaluwasan sa mga estudyante ug personnel.
Padayon ang imbestigasyon sa kapulisan aron matino ang tibuok panghitabo ug ang motibo sa pagpamusil.
Samtang gipadayag sa Department of Education kon DepEd nga andam silang muhatag og psychological first aid ug psychosocial support sa mga estudyante, magtutudlo ug personnel nga naapektuhan sa insidente.
