BUTUAN CITY – Padayon pang gi-imbestigahan sa Butuan City Police Station 1 ang natigayong pagpamusil atol sa gika-ingong pagpangawat sulod sa usa ka lodging house pasado ala-una kaganinang kaadlawon nga miresulta sa pagka-angol sa duha ka mga trabahante.
Naila ang mga biktimang sila Jomar Baldes ug Mayan Pal-ot, mga residente sa Barangay Mat-i, lungsod sa Las Nieves, Agusan del Norte.
Base sa inisyal nga impormasyon, kalit matud pang misulod sa maong lodging house ang usa ka lalaki nga nagsul-ob og helmet nga mikuha sa cellphone sa usa sa mga biktima.
Misulay matud pa pagpakiglayog si Jomar sa suspek apan gipusil kini sa ilok rason nga mikaratil pagdagan si Mayan paggawas nga gigukod pa sa suspek ug gipusil kondiin na-igo kini sa tiyan ug dali silang gidala sa Butuan Medical Center aron magpatambal.
Daling mikagiw sa wala pa matinong direksyon ang suspetsado sakay sa kolor itom nga Honda Click samtang gi-imbestigahan usab sa kapulisan ang maong insidente aron ma-ilhan ug mapanubag ang gunman sa iyang gihimo ug masuta ang motibo sa kremin.
