BUTUAN CITY – Mu-abot sa halos ₱1-M nga kantidad sa marijuana ang gi-turnover ngadto sa kapulisan human kini marekober sa managlahing lugar sa Caraga Region ning nakalabay nga adlaw.
Sigon ni Dindo Abellanosa, tigpamaba sa Philippine Drug Enforcement Agency kon PDEA-Caraga, pasado alas-4:22 sa hapon dihang giturn-over ang anaa sa usa ka kilo nga pakite sa marijuana nga mibalor sa 120-mil pesos sa Surigao City, sakop sa lalawigan sa Surigao del Norte.
Kini gawas pa sa narekober usab nila nga kapin kon kulang sa 6.36 ka kilo nga gidudahang uga nga marijuana ug marijuana kush, nga adunay gibana-banang standard value nga 840-mil pesos, sa Barangay Talisay, Nasipit, Agusan del Norte niadtong Oktubre 28, sa alas-7:30 sa gabii.
Lakip sa mga nakuhang butang ang lima ka tubular nga porma sa uga nga marijuana nga duna’y gibug-aton nga 5.60 ka kilo, duha ka tipak sa uga nga marijuana nga mokabat og 700 gramos, ug 16 ka transparent nga plastic sachet nga adunay gidudahang kush nga gibana-banang 60 gramos ang timbang.
Dugang ni Abellanosa, ang mga sirkumstansya nga mitumaw kalabot sa pagkarekober sa maong mga butang padayon pang giberipika ug giimbestigahan sa mga otoridad.
Alayon niini, gibutyag ni Abellanosa nga epektibo ang gihimong koordinasyon sa mga residente. Apan mas gipahugtan pa nila karun ang operasyon ilabina sa natumbok nga ang mga marijuana sagad mapadulong ngadto sa mga tourist destinations sa rehiyon.
Gipalihok nila karun ang ilang K-9 units aron maprotektahan ang mga terminals ug pantalan sa ingon dili magamit sa transportasyon sa ilegal nga drogas.
Padayon nga gi-awhag sa opisyal ang publiko nga makig-alayon sa otoridad alang sa pagpaningkamot nga makatukod og luwas, himsog og gawasnon sa ilegal nga drugas nga kumunidad sa rehiyon.
