BUTUAN CITY- Napili sa For Him Magazine Philippines kon FHM Philippines ang aktres nga si Sanya Lopez aron mahimong cover star sa November issue isip kabahin sa pagbalik sa publikasyon human sa taas nga panahon.
Gipakita sa opisyal nga Instagram account sa FHM ang aktres nga nagsul-ob og itom nga two-piece bikini sa ilang comeback cover, diin nahinumdoman usab ang pagkasikat niini human makasulod sa ika-20 nga puwesto sa FHM 100 Sexiest List niadtong 2017, isip pinakataas ang ranggo nga bag-ong nominado niadtong tuiga.
Sumala sa FHM, nagpadayon ang paglambo sa karera ni Sanya pinaagi sa nagkadaiyang papel sa mga teleserye ug pelikula, nga nakapalig-on sa pangalan niini sa industriya sa showbiz ug kulturang popular sa Pilipinas.
Lakip usab sa ilang November issue sila Faye Lorenzo, Vanessa Peña, Liezel Lopez, Analyn Barro ug Arra San Agustin. Sa pagkakaron, bida si Sanya sa pelikulang Red Crown ug mibalik usab sa iyang papel isip Danaya sa seryeng Sang’gre.
