BUTUAN CITY- Lauman sa mga motorista ang dakong rollback sa presyo sa mga produktong petrolyo sugod sunod semana, diin posibleng moabot sa 14 pesos kada litro ang rollback sa gasolina, P5 matag litro sa diesel ug P5.20 sa kerosene, base sa inisyal nga pagbana-bana sa Department of Energy kon DOE human sa unang upat ka adlaw nga trading karong semanaha.
Sumala ni DOE Oil Industry Management Bureau Director Rino Abad, nalambigit ang posibleng pag-ubos sa presyo sa lana sa resulta sa midterm elections sa Estados Unidos kansa nakapahuyang sa posibilidad nga mapadayon sa administrasyon ni US President Donald Trump ang pipila sa mga polisiya niini nga walay dakong pagsupak, lakip na usab ang paglaum nga posibleng matapos na ang panagbangi tali sa Estados Unidos ug Iran, nga nakapamenos sa kabalaka sa posibleng pagkabalda sa suplay sa lana sa tibuok kalibotan.
Apan, gibutyag usab ni Abad nga wala pay kasigurohan kung magpadayon ang pag-ubos sa presyo sa lana kon dili kini suportado sa aktuwal nga pagbangon sa suplay sa petrolyo.
Samtang sumala usab sa usa ka tinubdan gikan sa oil industry, posibleng moabot sa 13 pesos ug 50 sentimos kada litro ang rollback sa gasolina ug 4 pesos ug 50 sentimos sa diesel sa sunod semana.
