BUTUAN CITY – Suportado sa Tau Gamma Sigma fraternity and sorority Agusan del Norte chapter ang himuong Dugong Bombo 2026 bloodletting activity karong Nobyembre 14 sa Event Center, 3rd Floor sa SM Mall, Butuan City.
Base kini sa pagkumpirma sa ilang provincial chapter representative nga si Coleen Langheras kondiin sa eksklusibong pakighinabi sa Bombo Radyo Butuan, gipadayag niini nga 56 ang ilang mga chapters dinhi lang sa Tau Gamma Sigma – Butuan City Council ang gila-umang mulambigit sa pinakadako ug pinakaduguong usa ka adlaw nga bloodletting activity sa nasud kansa sugdan sa alas-sais sa buntag ngadto na sa alas-sais sa gabii.
Gipadayag ni Langheras nga ila nang gi-imbitar ang mga kasikbit nila nga provincial councils diha sa ilang mga group chat ug mga Facebook account rason nga la-uman ang hugot nga suporta sa ilang mga brothers ug sisters.
Dili na matud pa kini bag-o nga kalihukan alang kanila tungod kay sukad niadtong tuig 2005, aktibo na silang milambigit sa susamang kalihukan ug daghan usab sila nga mga successful blood donors.
