BUTUAN CITY – Nakapasar ang Tandag City sa regional evaluation sa 4th Quarter Nationwide Simultaneous Earthquake Drill (NSED), kondiin ang maong siyudad maoy host city ug regional ceremonial venue sa Caraga Region.
Kini human nakakuha ang siyudad og 3.04 nga rating. Gipangunahan ang maong kalihukan sa Office of Civil Defense (OCD) Caraga Region ug Caraga Regional Disaster Risk Reduction and Management Council (RDRRMC), uban sa koordinasyon sa lokal nga kagamhanan sa Tandag City ug sa nagkalain-laing ahensya ug stakeholders.
Kabahin sa drill ang pagpatuman sa “Duck, Cover, and Hold” procedure, nga gisundan sa pagbakwit sa mga partisipante ug simulated emergency response operations aron masuta ang ilang ka-andam ug pagsunod sa mga sumbanan sa pagtubag panahon sa linog.
Gipahigayon usab ang Tsunami Evacuation Drill isip kabahin sa pagsuporta sa World Tsunami Awareness Day.
Pinaagi niini, gisulayan ang kahibalo ug kaandam sa mga partisipante sa hustong pagbakwit panahon sa hulga sa tsunami, ilabina sa mga komunidad nga nahimutang sa kabaybayonan ug mga lugar nga posibleng maapektuhan niini.
