BUTUAN CITY – Gipadayag ni Reynaldo Dieta, Chairman sa White Transport Cooperative, nga naglisod na pag-ayo ang mga drayber sa Brgy Libertad ning siyudad sa Butuan tungod sa sunod-sunod nga pagsaka sa presyo sa produktong petrolyo, apan nagpabilin gihapon sa regular nga pletehan nga P10 tungod kay wala pa nakakuha ang maong kooperatiba og pagtugot gikan sa Sangguniang Panlungsod nga mopatuman og fare increase.
Sumala ni Dieta, mihangyo na ang ilang kooperatiba sa City Transportation and Traffic Management Department kon CTTMD sa Butuan City og clearance aron makapataas gamay sa pletehan, apan igo lang matud pa sila gipahibalo nga napasa na sa konseho ang ilang hangyo.
Gani, kanhi na usab nila gi-propose atol sa gihimong panagtapok ang gisugyot nga pletehan nga P13 sa unang duha ka kilometro ug dugang P2 sa matag sunod nga kilometro, apan hangtod karon wala pa kini maaprobahan ug mapatuman.
