BUTUAN CITY – Lima na ang namatay sa pagbusikad ug pagkasunog sa usa ka himu-anan og mga ilegal nga pabuto sa utlanan sa Barangay Tabo Sili ug Calbueg sa lungsod sa Malasiqui, Pangasinan, kagabii.
Sumala ni Malasiqui Vice Mayor Daria Dolores Mamaril, usa sa mga namatay ang 7-anyos nga bata dayong kumpirma nga magkabanay lang ang mga biktima nga nag-abang lang sa maong lugar.
Giklaro ni Mamaril nga dili residente sa maong barangay ang mga biktima, hinungdan nga wala usab nahibalo ang mga opisyal sa barangay nga adunay gihimong mga pabuto sa maong lugar.
Gigamit matud pa nga himu-anan og pabuto ang usa ka abandonadong piggery nga gi-abangan sa mga biktima.
Nasayrang duha lang sa magkabanay ang naluwas s mang insidente ug nasuta nga ang inahan ug usa sa iyang mga anak nga wala sa maong lugar dihang nahitabo ang insidente.
Padayon pa ang imbestigasyon sa mga otoridad aron matino kung ang mga biktima mismo ang nagprodyus sa mga pabuto o aduna pa silay laing tawo nga nagsuplay niini.
