BUTUAN CITY – Misaka og halos katulo ka pilo ang kaso sa dengue sa lungsod sa Carles, Iloilo, kondiin miabot na sa 406 ang natala nga kaso, lakip ang lima ka namatay gikan sa Enero 4 hangtod Oktubre 24 ning tuiga.
Mas taas kini og 184-porsiyento kung itandi sa 143 ka mga kaso nga natala sa susamang panahon niadtong tuig 2025.
Base sa datus, sa 33 ka barangay sa Carles, 14 niini ang nakatala og dengue clustering, samtang 55 ka bag-ong kaso ang nadugang atol sa monitoring week gikan Oktubre 18 hangtod 24.
Sa tibuok probinsiya sa Iloilo, mikabat na sa 4,863 ang kaso sa dengue ug 22 ang nangamatay.
Bisan og mas ubos kini og 7-porsiyento kung itandi sa mi-aging tuig, nagpabilin gihapong taas ang gidaghanon sa mga nataptan, ilabina sa mga batang nag-edad og singko hangtud 9-anyos.
Tungod niini, gi-awhag sa mga otoridad ang publiko nga hugot nga sundon ang 4S kontra dengue, lakip ang pagpanglimpyo ug pagwagtang sa mga itluganan sa lamok, paggamit og proteksiyon batok sa pagpa-ak sa mga niini, sayong pagkonsulta sa doktor ug pagsuporta sa fogging sa mga lugar nga gi-ila nga dengue hotspots.
