BUTUAN CITY – Mi-abot sa 178 ka mga magtutungha gikan sa walo ka mga tunghaan sa elementarya ug sekondarya sa lungsod sa Lingig, Surigao del Sur, ang nabiktima sa gitu-uhang usa ka kaso sa food poison human nakakaon sa gihanyag nga pagkaong gika-ingong parte sa school-based feeding program.
Apil sa maong mga tunghaan ang San Roque Elementary School, Pagtilaan Integrated School, Union Elementary School, Tigbawan Elementary School, Santa Maria Elementary School, Bantigan Elementary School ug Mandus Elementary School.
Sa eksklusibong pakighinabi sa Bombo Radyo Butuan, gipadayag ni Dr Pedro Tecson, tigpamaba sa Department of Education kon DepEd-Caraga, nakig-alayon na sila sa Lingig Municipal Health Unit aron himuon ang water testing tungod sa posibilidad nga hayan nakatampo sa maong insidente ang tuburan sa tubig ma-inom sa mga apektadong tunghaan.
Hangtud nga wala pa’y opisyal nga resulta sa mga laboratory tests nga gihimo, gilikayan una niya ang bisan unsa mang mga espekulasyon apil na ang gitu-uhan sa uban nga nagsumikad kini sa food supplier sa feeding program.
Hinuon giklaro sa opisyal nga ang tanang 178 ka mga magtutunghang biktima, ilang gidala sa ospital kondiin tulo ang na-admit ug sa maong ihap, nakagawas na ang duha samtang usa ang padayon pang gi-obserbahan.
Dugang pa ni Tecson, aron dili na ma-usab pa ang maong insidente kansa ikaduha na sa maong lungsod, ila nang ipaluto sa ilang centralized kitchen ang mga pagkaong parte sa feeding program.
Kini i-supervise unya sa school nutritionist sa ingon dili na sila magsalig sa mga food suppliers nga wala’y nasayod kung gi-unsa pag-handle ang mga pagkaon ug dinhi na i-transport ang mga malutong pagkaon ngadto sa mga dug-ol lang nga tunghaan.
