BUTUAN CITY- Gipahibalo sa ASEAN Specialised Meteorological Centre kon ASMC ang pagpatuman sa labing taas nga Alert Level 3 alang sa habagatang rehiyon sa ASEAN tungod sa nagpadayong sunog sa Indonesia nga nagtabon sa pipila ka bahin sa Southeast Asia sa makahilo nga aso.
Gipagawas ang alerto niadtong Biyernes tungod sa grabeng kalihokan sa mga sunog, baga nga aso, nagpadayong uga nga panahon ug hangin nga nagdala sa aso ngadto sa silingang mga nasod.
Ang dugay nang problema sa aso nakaapekto sa adlaw-adlaw nga kinabuhi sa rehiyon, hinungdan sa pagsira sa mga eskwelahan ug pagdaghan sa mga kaso sa mga sakit sa pagginhawa.
Samtang, mipahimangno ang Singapore nga mag-isyu kini og mga pasidaan ngadto sa pito ka kompanya sa Indonesia nga giila nga may kalabotan sa mga sunog, apan nagpasidaan usab nga posibleng mas mograbe pa ang sitwasyon sa umaabot nga mga adlaw.
