BUTUAN CITY- Gisaulog sa lungsod sa Loreto, Dinagat Islands, kagahapong adlawa Oktubre 17, 2026, ang ika-82 nga anibersaryo sa World War II Loreto Landing pinaagi sa usa ka seremonyas nga gipahigayon sa Black Beach No. 2, Barangay Campintac, isip paghinumdom sa pagdunggo sa mga sundalong Amerikano sa maong dapit sa wala pa ang Battle of Surigao Strait.
Gipangulohan ni Mayor Doan Dre Bill Ladaga ang kalihukan, diin gihatagan og gibug-aton ang kamahinungdanon sa maong panghitabo sa kasaysayan sa Loreto ug sa tibuok probinsya, lakip ang mga sakripisyo sa mga sundalong Pilipino ug Amerikano alang sa kagawasan.
Mitambong usab ang mga opisyal sa Sangguniang Panlalawigan, mga representante sa buhatan ni Vice Governor Jade Ecleo ug Congresswoman Kaka Bag-ao, Philippine Army, Philippine Coast Guard, Philippine National Police, Department of Education, ug mga opisyal sa lokal nga pangagamhanan ug turismo.
Mingtambong usab si Atty. Salvador Panelo, kanhi tigpamaba ni kanhi Presidente Rodrigo Duterte, kansa nanawagan alang sa libreng edukasyon, serbisyong medikal, pagpanalipod sa katungod sa katawhan, ug pagpanubag sa mga nalambigit sa korapsyon ug pag-abuso sa gahum.
Bisan wala personal nga makatambong, mipadayag usab og suporta si Governor Nilo Demerey Jr. Ang pagsaulog nagpasiugda sa kamahinungdanon sa pagpreserbar sa kasaysayan aron mapalalom sa sunod nga henerasyon ang pagsabot sa bili sa kagawasan, panaghiusa, kalinaw, ug sakripisyo alang sa nasud.
