BUTUAN CITY – Patay na si kanhi Northern Samar First District Representative Raul Daza sa edad nga 91- anyos base sa pagkumpirma sa iyang pamilya, human sa lima ka dekada nga pagserbisyo sa publiko.
Dugang sa iyang pamilya, dili lamang sa serbisyo publiko nagmalampuson si Daza, kondili apil usab sa iyang propesyon, human makakuha sa pinakataas nga marka sa Bar Examination ug mahimong Certified Public Accountant o CPA.
Sulod sa 61 ka tuig, nahimong miyembro si Daza sa Liberal Party kon LP, diin nahimo siyang usa sa mga misupak sa deklarasyon ni kanhi Pangulong Ferdinand Marcos Sr. sa martial law.
Napugos siyang mopahawa sa nasud ug nagpuyo sa Estados Unidos human ipagawas ang mando sa pagdakop kaniya ni Marcos.
Didto sa California, gipadayon niya ang iyang pagsupak sa administrasyon ni Marcos.
Duha ka tuig human mapatay si kanhi Senador Benigno “Ninoy” Aquino Jr. sa Manila International Airport niadtong Agosto 21, 1983, mibalik si Daza sa Pilipinas.
Nahimo siyang usa sa mga hilom apan importanteng personalidad sa Liberal Party atol sa pagpangandam alang sa 1986 elections.
Human sa EDSA People Power Revolution, gitudlo siya sa nagkada-iyang posisyon sa gobyerno, lakip na sa Presidential Commission on Good Government ug isip Commissioner sa Presidential Commission on Constitutional Reforms.
Ang iyang apo nga si Niko Raul Daza mao ang kasamtangang representante sa unang distrito sa Northern Samar.
