BUTUAN CITY – Gikonsidera na sa usa ka respetadong medical research journal ang grabeng kainit ug taas nga heat index angay nang ideklara isip usa ka global health emergency tungod sa dakong hulga niini sa panglawas ug kinabuhi sa mga tawo.
Base sa mga pagtuon sukad 2016 hangtod karon, napamatud-an ang dakong epekto sa climate change sa panglawas sa katawhan, ilabina sa mga nasud sama sa Pilipinas nga kanunay makasinati og grabeng ka-init.
Tungod niini, padayon ang pahimangno sa state weather bureau kalabot sa taas nga heat index sa nagkada-iyang bahin sa nasud, diin niabot sa 43 degrees Celsius ang natalang heat index sa Bacnotan, La Union; Iloilo City; Dumangas, Iloilo; Mambusao, Capiz; ug Butuan City, Agusan del Norte.
Gi-awhag ang publiko nga mag-inom og igong tubig ug mogamit og sunblock kon mogawas sa balay, ilabina tali sa alas-10 sa buntag hangtod alas-4 sa hapon aron malikayan ang dili maayong epekto sa grabeng kainit.
