BUTUAN CITY- Gikumpirma sa mga Health authority sa France ang unang kaso sa Shamonda virus sa tawo, usa ka virus nga kasagarang makaapekto sa mga hayop sama sa baka.
Ang pasyente, nga grabeng huyang ang resistensiya, namatay sa sayong bahin niining bulana human makasinati og komplikasyon sa utok ug nerbiyos nga posibleng nalambigit sa maong impeksiyon.
Base sa inisyal nga imbestigasyon, gituohang natakdan ang pasyente pinaagi sa pinaakan sa gagmayng insekto sa sidlakang Pransiya.
Sa pagkakaron, wala pay nakitang hulga sa panglawas sa publiko, bisan pa nga natala na ang virus sa 14 ka nasod sa Kasadpang Europe.
Gipahibalo na usab ang World Health Organization ug ang European Centre for Disease Prevention and Control, samtang nagpadayon ang imbestigasyon aron masuta ang mga epekto ug posibleng risgo sa virus.
Gipasiugda sa mga eksperto nga walay hinungdan sa pagkabalaka sa publiko sa pagkakaron, apan importante ang padayong pagbantay ug pagsusi sa mga bag-ong impeksiyon, ilabina kadtong posibleng makaapekto sa utok.
