BUTUAN CITY – Nakasakmit og og bronze medal alang sa Pilipinas si Ma. Ravinia Carpena sa women’s shot put F20 sa 5th Asian Para Games nga gipahigayon sa Aichi-Nagoya, Japan, human niya natala ang bag-ong personal best nga 11.39 metros.
Ikatulo si Carpena sa final, samtang nakuha ni Japanese Reina Hori ang gold medal pinaagi sa 13.57 metros, ug silver kang Siti Noraidah Suherman sa Malaysia human nakalabay sa gilay-ong 11.41 metros.
Bisan pa sa hugot nga kompetisyon, milapas si Carpena sa iyang kanhi personal record, nga nakahatag kaniya og laing medalya alang sa Pilipinas sa para-athletics.
Kini ang iyang Asian Para Games debut, human usab siya makadaog og bronze sa susamang event sa 2023 ASEAN Para Games.
Sa pinakabag-ong medal tally, anaa sa ika-18 nga pwesto ang Pilipinas nga adunay duha ka gold, duha ka silver ug tulo ka bronze, alang sa kinatibuk-ang pito ka medalya.
