BUTUAN CITY – Gimanduan ni Agriculture Secretary Francisco P. Tiu Laurel Jr. ang DA Inspectorate and Enforcement Office ug ang Bureau of Plant Industry o BPI nga imbestigahan ang gika-ingong pagpalusot og mga carrots ug broccoli nga naka-apekto sa panginabuhian sa mga lokal nga mag-uuma sa Cordillera Administrative Region.
Gisundan kini sa monitoring operations sa Baguio City ug La Trinidad, Benguet, diin nadiskobrehan ang mga imported nga broccoli nga gibaligya sa merkado ug adunay marka nga “Product of China” kondiin ang maong mga gulay, gika-ingong gikan sa usa ka supplier sa Divisoria.
Base sa mga report, naglisod ang mga lokal nga mag-uuma sa pagbaligya sa ilang mga ani tungod kay adunay mga konsumante nga mas mopili sa mas barato nga imported nga mga utanon, nga mahimong mu-abot og hangtod P250 kada kilo.
Gipasidan-an sa Department of Agriculture nga kung mapamatud-an nga nalambigit sa paglapas sa Anti-Agricultural Economic Sabotage Law ang mga responsable sa maong kalihukan, mahimo silang atubangon sa tukmang kaso ug silot subay sa balaod.
Kabahin usab sa imbestigasyon ang pagkuha sa Bureau of Plant Industry og mga samples sa mga gulay aron ipaagi sa laboratory examination ug susihon kung adunay presensya sa formalin o heavy metals, alang sa pagseguro sa kaluwasan ug kahimsog sa mga konsumante.
