BUTUAN CITY – Gihatagan og emosyonal nga selebrasyon sa kinabuhi ang komedyanteng si Ate Gay samtang nagpadayon kini sa pagpakigbisog batok sa stage 4 niya nga sakit nga kanser, kondiin nagtigom ang iyang pamilya ug suod nga mga higala aron ipadayag ang ilang gugma ug pagpasalamat ngadto kaniya.
Gitawag kini nga living funeral, usa ka seremonyas diin gisaulog ang kinabuhi sa usa ka tawo samtang buhi pa aron personal niyang madungog ang mga pagdayeg, pasalamat ug mga mensahe gikan sa iyang mga minahal sa kinabuhi.
Gipahigayon ang maong kalihokan sa Forest Lake Memorial Parks sa Biñan, Laguna, nga giulohan og “Habang Naririto Ka: A Celebration of Life.” Didto gihatagan og higayon si Ate Gay, kon Gil Aducal Morales sa tinuod nga kinabuhi, nga madungog mismo ang kinasingkasing nga mga mensahe ug pagpangga sa mga tawo kansang kinabuhi, iyang natandog.
Atol sa kalihokan, wala makapugong sa iyang emosyon ang komedyante samtang naminaw sa mga istorya sa mga tawo nga iyang natabangan ug nadasig pinaagi sa iyang mga nahimo.
Matod pa ni Ate Gay, karon lamang niya nasayran ang kadaghan sa mga tawo nga iyang natabangan, human niya madungog ang ilang mga mensahe ug kasinatian.
Dako ang iyang pagpasalamat tungod kay human ang sunod-sunod iyang pagpatambal, wala na ang bukol sa iyang ilong ug tutunlan dungan sa panghinaut alang sa iyang hingpit nga kaayuhan.
