BUTUAN CITY – Nakit-an na ang 14-anyos nga bayong-bayong kinsa nalumos sa dagat sa Purok Sandia, Barangay Victoria, lungsod sa Tago, Surigao del Sur kagahapon adlawa.
Napalgan ang biktima nga si alyas nga Bundulo, residente sa Purok Macopa, sakop sa maong barangay kaganina dihang gipadayon ang search and retrieval operation human nga wala kini mapalgi kagahapon, pila ka oras human ang iyang pagkahanaw samtang naligo og dagat duol sa crossing ug beachfront area sa Tago Terminal, ka-uban ang iyang mga higala.
Una nang gibutyag ni Tago Municipal Disaster Risk Reduction and Management Officer 2 Engr. Alex Salmazan nga human nadawat nila ang impormasyon kalabot sa maong insidente alas 12:00 sa udto, gelayon silang miadto sa lugar nga nahitaboan aron mohimo og search and rescue operation.
Apan risgo na kaayo sa ilang mga rescuers og responders ang paghumol sa dagat tungod sa dagkong mga balud rasong anaa lang sila sa kilid og nag-obserba hangtud sa alas 4:00 sa hapon kondiin wala’y senyales sa nalumos nga biktima.
Subay niini, gipahimangnoan ang tanan nga likayan ang aktibidad sa kadagatan ilabina kay gibana-banang molungtad pa sa pipila ka adlaw ang daot nga panahon tungod sa easterlies.
Gipahinumdoman usab ang mga ginikanan ug nga bantayan pag-ayo ang mga bata ug dili sila pasagdan nga magdula duol sa baybayon, suba, kanal ug ubang lugar nga posibleng mabahaan samtang likayan ang pagtabok sa mga dalan nga gibahaan o adunay kusog nga agas sa tubig.
