BUTUAN CITY – Kapin sa 40 ka pilot whales ang napalgang nangamatay human na-stranded sa usa ka baybayon sa New Zealand.
Nasigpatan ang pundok sa mga pilot whales sa baybayon sa Ngawi, duol sa Cape Palliser sa North Island sa New Zealand.
Sumala sa Department of Conservation (DOC) sa maong nasud, base sa inisyal nga report sa Project Jonah New Zealand – usa ka environmental organization, kapin sa 20 ka balyena ang unang na-stranded sa baybayon, diin upat niini ang buhi pa.
Nakig-alayon na sila sa mga ahensya sa gobyerno sa New Zealand ug sa lokal nga tribu sa mga Māori aron luwason ug ibalhin sa luwas nga dapit ang mga buhi pang balyena, lakip na ang pagsusi sa ilang kahimtang sa panglawas.
Laing 43 ka patay nga balyena nga nagkatag sa kapin usa ka kilometro nga gilay-on gikan sa baybayon sa Ngawi hangtod sa Mangatoetoe ang napalgan.
Sumala sa DOC, kasagarang mahitabo ang pag-stranded sa maong matang sa balyena, apan hangtod karon wala pa matino ang tinuod nga hinungdan niini.
