BUTUAN CITY – Gitahasan ni Israeli President Isaac Herzog ang kanhi hepe sa militar nga si Gadi Eisenkot sa pagporma sa sunod nga gobyerno sa Israel, imbes nga itahas unta niya kini kang incumbent Prime Minister Benjamin Netanyahu, nga iyang kaatbang sa politika.
Pormal nga itugyan kang Eisenkot ang mandato atol sa seremonya ning adlawa human gipahigayon ni Herzog ang konsultasyon sa nagkada-iyang partido sa politika.
Gisuportahan si Eisenkot sa 67 ka mga miyembro sa Knesset o parlamento sa Israel, lakip ang mga representante gikan sa mga partidong gipangulohan sa mga Arabo, samtang 46 lamang ang mipabor kang Netanyahu.
Kini human nga wala’y kampo nga nakakuha sa gikinahanglang mayorya sa kinatibuk-ang eleksyon niadtong Oktubre 27.
Alayon niini, gihatagan si Eisenkot og 28 ka adlaw aron makaporma og koalisyon nga makakuha og labing menos 61 ka lingkoranan gikan sa kinatibuk-ang 120 ka miyembro sa Knesset, apan mahimo pa kining lugwayan og 14 ka adlaw.
Sa resulta sa eleksyon, 48 ka lingkoranan ang nakuha sa alyansa ni Eisenkot, samtang 53 ang nakuha sa right-wing ug religious bloc ni Netanyahu.
Nakarekord usab og 19 ka lingkoranan ang mga partidong gipanguluhan sa mga Arabo.
Bisan pa sa suporta sa mga partidong Arabo, wala magtinguha si Eisenkot nga makig-alyansa kanila.
Hinuon, iyang gitan-aw ang posibilidad nga makuha ang suporta sa duha ka ultra-Orthodox parties nga United Torah Judaism ug Shas, nga makahatag kaniya og eksaktong 61 ka lingkoranan.
Mahimo usab siyang makaporma og gobyerno bisan ubos niini nga gidaghanon kung makuha niya ang pagsalig ug pag-uyon sa kadaghanan sa parlamento.
