BUTUAN CITY – Gi-impeach na ug gipa-ilalom sa house arrest si Paraguay President Santiago Peña human mibotar ang mga magbabalaod, lakip ang pipila ka miyembro sa iyang kaugalingong partido, pabor sa pagtangtang kaniya sa puwesto tungod sa krisis nga miresulta sa pagkahugno sa Ueno Bank sayo ning semanaha.
Gidakop si Peña pipila lamang ka minuto human mapasar ang impeachment vote batok kaniya.
Sa wala pa kini mahitabo, mihanyag na siya siya nga mobiya sa iyang posisyon apan mas gipili sa mga magbabalaod nga ipadayon ang impeachment ug pasakaan siya og kaso kalabot sa dika-ingong misconduct imbes nga dawaton ang iyang pag-resign.
Tungod niini, nawad-an usab siya sa iyang pribilehiyo nga mahimong senador hangtod sa hangtod ug sa immunity nga gihatag sa mga kanhi presidente.
Sa iyang bahin, gilimod ni Peña ang bisan unsang kalapasan, bisan pa nga hangtod sa mi-aging tuig nanag-iya pa siya og shares sa kompanyang tag-iya sa maong bangko.
Ang pagkahugno sa digital bank, maoy hinungdan nga kapin sa katunga sa populasyon sa Paraguay ang dili na maka-access sa ilang mga tinigom human kini gisakmit ug gipa-ilalom sa kontrol sa Central Bank of Paraguay.
Gibana-bana nga mokabat sa 3-milyunes ka mga depositors ang hangtod karon dili gihapon makuha ang ilang mga tinigom ug pension rason nga misamot ang nagkalapad nga mga protesta, ilabina sa kapital nga siyudad sa Asuncion.
Lakip sa mga alegasyon nga gihimong basehan sa impeachment batok kang Peña ang conflict of interest, pagmani-obra sa regulatory oversight, pagbalhin sa pondo sa pension, ug pag-apil sa gika-ingong pagtabon sa mga iregularidad nga nalambigit sa Central Bank of Paraguay.
