BUTUAN CITY – Ang wala matumang mga saad ni United States President Donald Trump ang nag-unang rason nga napildi ang mga kandidato sa Republican Party diha sa House of Representatives ug sa Senado.
Sa eksklusibong pakighinabi sa Bombo Radyo Butuan, gipadayag ni Bombo international correspondent to Los Angeles, California Ferdinand Nakila nga ang rason nga midaog ang Republicans sa mi-aging eleksyon, tungod kini sa saad ni Trump nga palambuon ang ilang ekonomiya ug mahimong tulay alang sa kalinaw.
Apan sukwahi ang tanang nahitabo tungod kay gidugangan na hinuon matud pa sa iyang administrasyon ng problema sa ilang nasud ilabina ang pakiggiyera sa Iran hinungdan sa taas nga presyo sa mga produktong petrolyo nga naka-apekto dili lang sa Amerika kondili apil na sa daghang kanasuran sa tibuok kalibutan.
Dugang pa ni Nakila, kini usab ang rason nga misamot nga hangtud karon, wala makadaog ang Republicans sa ilang estado sa California ilabina sa Senado gawas na lang sa House of Representatives nga posibleng duna sila’y tsansang makalusot.
Nakadugang usab matud pa ni Nakila sa kapildihan sa Republicans ang pagtangtang sa budget alang sa katawhan sama sa pagkaon, kapuy-an sa mga homeless, healthcare services ug uban pa ug mas gipili ni Trump nga didto igasto sa dili kinahanglan sa mga Amerikano sama sa pag-finance sa giyera sa ubang kanasuran.
Gani ang kadismaya sa katawhan sa kadumalahan ni Trump maoy rason sa pagtumaw karon sa isyu nga posibleng unahon sa nangdaug nga mga magbabalaud ang pagpa-impeach kaniya sa posisyon.
