BUTUAN CITY- Pakyas si Filipina tennis star Alex Eala nga makuha ang ikaduhang kampeonato karong tuiga human mapildi sa American player nga si Claire Liu sa finals sa 2026 Hong Kong Tennis Open nga gipahigayon sa Victoria Park ning Dominggo.
Gidaog ni Liu, nga ika-102 sa world rankings, si Eala pinaagi sa 6-3, 6-0 nga puntos aron makuha ang iyang unang kampeonato sa Women’s Tennis Association o WTA Tour, human makompleto ang iyang kampanya sa Hong Kong nga wala mapildi sa bisan usa ka set.
Bisan pa sa kapildihan, nindot gihapon ang kampanya ni Eala nga wala pay 24 oras una niini nakadaog batok sa world number 30 nga si Maria Sakkari sa usa ka lisod nga semifinal match nga milungtad og tulo ka sets.
Apan wala na niya mausab ang maong kalampusan batok kang Liu, nga mipakita og dominanteng duwa hangtod makuha ang titulo.
