BUTUAN CITY- Nagpagawas na og opisyal statement ang Lokal nga pangamhanan sa General Luna kalabot sa permanent closure sa Malinao Skate Road subay sa direktiba sa Department of Public Works and Highways kon DPWH, human sa pormal nga reklamo nga gisang-at ngadto sa Office of the Ombudsman.
Gipasabot pa sa LGU nga supak sa nasudnong balaod ang paggamit sa mga right-of-way sa national roads alang sa skateboarding, komersiyal nga operasyon ug mga panagtapok nga walay awtorisasyon tungod sa peligro nga mahimo niini sa kaluwasan sa mga motorista ug publiko.
Bisan pa niini, giila sa lokal nga pangagamhanan ang importansya sa skateboarding culture ug ang epekto sa pagsira niini sa mga lokal nga negosyante, hinungdan nga nakigtambayayong na usab kini sa mga hingtungdan alang sa pagtukod og pampublikong skate park nga mahimong luwas ug legal nga pasilidad alang sa mga kabatan-onan ug skateboarding community.
Sa pagkakaron, nagpadayon ang LGU sa pagproseso sa gikinahanglang pondo ug badyet alang sa maong proyekto, samtang nagpadayon usab ang koordinasyon sa DPWH ug ubang ahensiya aron masiguro ang pagsunod sa balaod ug mapadayon ang responsable nga turismo sa lungsod.
