BUTUAN CITY – Mi-ani og managlahing reaksyon ang pagpalig-on sa Korte Suprema sa Republic Act 12326 nga naglugway sa tulo ka tuig nga termino sa mga barangay ug sangguniang kabataan officials ngadto sa lima ka tuig gawas pa sa pagsibog sa eleksyon ngadto sa Nobyembre 2028.
Sigon ni Kagawad Felipe Abaday sa Brgy Golden Ribbon ning siyudad sa Butuan, nalipay siya sa maong desisyon tungod kay malugwayan man ang pagpatuman sa iyang mga proyekto alang sa ilang barangay.
Apan kung siya ang pabut-on, gusto niyang tulo ka tuig lang unta ang ilang termino tungod kay kung ang mga barangay ug SK officials nga wala magtinarong sa ilang trabaho, mapulihan gilayon sa iyang mga constituents.
Wala matud pa’y problema niadtong mga opisyal nga nagtinarong sa ilang serbisyo tungod kay bisan og tag-tulo ka tuig ra ang termino, pilion man gihapon sila sa katawhan apan luoy ang katawhan kung ang ilang mga napiling opisyal, wala’y nahatag nga kaayuhan kanila ug sa ilang barangay tungod kay taas-taas ang panahon nga ilang antuson.
Dili matud pa angayang problemahon sa mga incumbent officials ug sa katawhan kung duna’y ilang mga proyektong ma-apektuhan ilabina kadtong naghatag og kaayuhan sa katawhan tungod kay masugyot ra man nila kini sa ilang mga sumusunod.
Samtang sa hisgutanang barangay development plan, giklaro ni Kagawad Abaday nga kada-tuig nila kining ginahimo. Gawas na lang sa mga proyektong dinagko kondiin magpatabang na sila sa city government o kaha sa Congressional office.
