BUTUAN CITY – Gikuwestiyon ni House prosecutor Terry Ridon ang kinatibuk-ang pagsupak sa kampo sa depensa ni Vice President Sara Duterte batok sa tanang dokumentong ebidensiya nga gipresentar sa House prosecution panel kalabot sa alegasyon sa unexplained wealth o bahandi nga wala matino ang gigikanan.
Sigon ni Ridon, lakip sa mga gisupak sa depensa ang tanang Statements of Assets, Liabilities and Networth kon SALN, mga rekord sa bangko, mga dokumento sa insurance, ingon man ang mga rekord gikan sa Bureau of Internal Revenue o BIR ug Anti-Money Laundering Council o AMLC.
Dugang pa sa magbabalaud, katingalahan ang kinatibuk-ang pagsupak sa depensa tungod kay ang mga abogado mismo ni Vice President Sara Duterte mitambong sa husay ug nangutana pinaagi sa cross-examination sa mga testigong nagpamatuod sa maong mga dokumento.
Kumpyansa usab si Ridon nga dili uyonan sa Senate Impeachment Court ang pagsupak sa depensa batok sa tanang ebidensiya.
Apan anaa gihapon sa mga senador nga naglihok isip mga huwes ang katungod sa pagdesisyon kung asa sa mga dokumento ang dawaton isip ebidensiya sa impeachment case.
Gila-uman nga ipadayon ang impeachment trial sa Nobyembre 9, diin andam usab ang House prosecution nga i-cross-examine ang mga testigong ipresentar sa kampo sa depensa.
