BUTUAN CITY – Posibleng mosulod sa Philippine Area of Responsibility (PAR) ang Severe Tropical Storm Cempaka unyang gabii o9 kaha unyang kaadlawon, Nobyembre 9.
Sumala sa Philippine Atmospheric, Geophysical and Astronomical Services Administration kon PAGASA, gilaumang wala kini direktang epekto sa nasud ug tawgon unyang Tropical Storm Samuel higayong makasulod na sa PAR line.
Sa pinaka-ulahing monitoring, nasigpatan ang bagyo sa gilay-ong 1,865-kilometros sa sidlakan sa Extreme Northern Luzon, nga nagdala og hangin nga mu-abot sa 110-kilometros matag oras ug buylo nga mu-abot sa 135-kilometros matag oras.
Magdala kini og madag-umong kalangitan ug pag-ulan ang amihang bahin sa Northern Luzon.
Samtang easterlies usab ang hinungdan sa pag-ulan ug thunderstorms sa Bicol Region, Eastern Visayas, Quezon ug pipila ka bahin sa Mindanao.
Gila-uman usab ang panagsang pag-ulan, pagpangilat ug panalugdog sa Metro Manila ug uban pang bahin sa nasud.
