BUTUAN CITY – Mipirma na og defense agreement ang Estados Unidos, Denmark ug Greenland nga magtugot sa Washington nga magtukod og duha ka bag-ong military bases sa Arctic territory, samtang subling nakumpirma sa soberanya sa Copenhagen ibabaw niini.
Sa wala pa ang seremonya sa pagpirma atol sa United Nations General Assembly sa New York, gibutyag ni United States President Donald Trump nga sugdan gilayon nila ang proseso sa pagtukod og dakong presensya militar sa mga angay nga lokasyon tungod kay mao man kini ang magtapos sa kapin usa ka tuig nga tensyon sa Arctic territory.
Samtang gipadayag usab ni Danish Prime Minister Mette Frederiksen, makaayo ang maong kasabutan alang sa tulo ka nasud apil na sa Urupa ug sa North Atlantic Treaty Organization kon NATO.
Gibutyag usab si Greenland Prime Minister Jens-Frederik Nielsen nga kini usa ka win-win-win solution para sa tanang tulo ka panig.
Una nang nagbahad si Trump nga iyang kuhaon ang semi-autonomous nga Arctic territory tungod sa iyang mga kabalaka sa national security. Lakip niini ang estratehikong lokasyon sa Greenland alang sa depensa ug ang kadagaya niini sa mga minerales.
Ang pamahayag ni Trump nakapukaw og pagsupak gikan sa mga taga-Greenland, mga Danish ug mga lider sa Europe rason nga nagpagawas sila og hini-usang pamahayag nga nagbutyag nga ang iyang mga pulong makapahuyang sa transatlantic relations ug mahimong musangpot ngadto sa usa ka peligroso nga sitwasyon.
Ang maong kasabutan nag-amenda ug nag-update sa usa ka defense agreement nga gipirmahan tali sa Denmark ug Estados Unidos niadtong 1951.
