BUTUAN CITY – Bisan og gikalipay sa daghang kalalakin-an sa lungsod sa Cantilan, Surigao del Sur, apan mas daghan ang mikondena sa matud pa, paghimo na nga daw hostess bar tungod sa pag-imbitar og mga babayeng sexy dancers nga naka-two piece ug one-piece lang ang suot adiser ang gipahigayong derby kagahapong adlawa.
Nag-viral karon sa social media ang derby nga gihimo sa Rozano Cantilan Cockpit Arena tungod sa dance show sa mga gibayrang dancers nga gipasayaw-sayaw sa may cockfighting pit.
Mas mi-ani og pagsaway dihang nagpalingkod og mga lalaki sa tunga nga bahin unya gibutangan og kwarta ang nagpada-iyang parte sa ilang lawas unya gikuha sa mga dancers gamit lang ang ilang ba-ba.
Tungod niini daghan sa mga Cantilanons ang nangutana kung mao ba kini ang klase sa kalihokan nga gustong makita sulod sa usa ka public venue sama sa sabungan.
Daghan usab ang nagkwestyon kung gitugutan ba kini o aduna’y permit o misunod sa balaud ug sa mga sumbanan sa public decency ingon man sa kahapsay ug kalinaw.
Nag-demand usab ang uban nga imbestigahan kini sa rasong katungod matud pa sa katawhan nga masayod sa regulatory responsibility sa nagdumala niini ingon man ang tulubagon sa mga opisyal sa maong lungsod ngadto sa ilang mga lungsuranon.
